កំពូលទ្រឹស្តី

ទំព័រដើម » ធ្វើអាជីវកម្ម

Showing posts with label ធ្វើអាជីវកម្ម. Show all posts

វិភាគអាជីវកម្មដោយប្រើ PESTEL! ចុះអ្វីទៅជា PESTEL?

ការវិភាគអាជីវកម្មដោយប្រើប្រាស់ PESTEL នឹងធ្វើឱ្យម្ចាស់អាជីវកម្មអាចកំណត់បាននូវកត្តាខាងក្រៅ Macro (external) ដែលស្ថាប័នមួយអាចនឹងប្រឈម។ មុននឹងការចាប់ផ្ដើមអាជីវកម្ម ការប្រើប្រាស់ PESTEL គឺជារឿងចាំបាច់មួយដើម្បីធានាបានថា អាជីវកម្មរបស់អ្នកដែលបើកដំណើរការ មិនប្រឈមនឹងបញ្ហាច្រើន។ PESTEL គឺមកពីពាក្យកាត់ទាំង ៦ខាងក្រោម៖

P (Political Factor)៖ កត្តានយោបាយ
នេះជាចំណុចសំខាន់មួយដែលយើងត្រូវការវិភាគទៅលើតួនាទីរបស់រដ្ឋាភិបាលនៅក្នុងសេដ្ឋកិច្ច ពោលថាតើរដ្ឋាភិបាលអាចចូលអន្តរាគមន៍នៅក្នុងសេដ្ឋកិច្ចកម្រិតណា។ ពាក់ព័ន្ធនឹងចំណុចនេះ យើងមើលទៅលើ គោលនយោបាយរបស់រដ្ឋាភិបាល ស្ថិរភាពនយោបាយក្នុងប្រទេស អស្ថិរភាពនៅក្នុងទីផ្សារក្រៅប្រទេស គោលនយោបាយពាណិជ្ជកម្មអន្តរជាតិ គោលនយោបាយសារពើពន្ធ ច្បាស់ការងារ គោលនយោបាយពាណិជ្ជកម្ម ជាដើម។

មិនថានៅប្រទេសណានោះទេ កត្តានយោបាយគឺជារឿងដែលសំខាន់ និងចំណុចដែលមានឥទ្ធិពលទៅលើស្ថាប័ន (ឯកជន) និងប៉ះពាល់ដល់បរិយាកាសអាជីវកម្មទាំងមូល។ ត្រង់ចំណុចនេះដែរ ស្ថាប័ន ឬអាជីវកម្មត្រូវតែមានវិធានការក៏ដូចជាផែនការសម្រាប់ឆ្លើយតបទៅនឹងបញ្ហានាពេលបច្ចុប្បន្ន និងគិតទុកជាមុន និងត្រូវតែកែតម្រូវផែនការទីផ្សារស្របទៅតាមនឹងគោលនយោបាយរបស់រដ្ឋាភិបាល។

E (Economic Factors)៖ កត្តាសេដ្ឋកិច្ច
កត្តាសេដ្ឋកិច្ចនេះគឺជាធាតុផ្សំ និងសំខាន់ទីពីរដែលមានឥទ្ធិពលមកលើអាជីវកម្ម និងការបង្កើតប្រាក់ចំណេញរបស់ស្ថាប័នឯកជននីមួយៗ។ កត្តាសំខាន់ដែលអាជីវកម្មត្រូវពិនិត្យមើលរួមមាន កំណើនសេដ្ឋកិច្ច អត្រាការប្រាក់ អត្រាប្ដូរប្រាក់ អតិផរណា និង កម្រិតប្រាក់ចំណូលប្រជាជនប្រជាជនជាដើម។ ពាក់ព័ន្ធនឹងកត្តាសេដ្ឋកិច្ចនេះដែរ គេអាចបំបែកវាទៅជាពីរផ្នែកសំខាន់ៗគឺ កម្រិតម៉ាក្រូ និងកម្រិតមីក្រូ។

កម្រិតម៉ាក្រូ គឺពាក់ព័ន្ធទៅនឹងការគ្រប់គ្រងតម្រូវការទីផ្សារនៅសេដ្ឋកិច្ចប្រទេសមួយ។ ត្រង់ចំណុចនេះគឺចង់សំដៅទៅដល់ចំណាត់ការរបស់រដ្ឋាភិបាលទៅលើ គោលនយោបាយកំណត់អត្រាការប្រាក់ គោលនយោបាយសារពើពន្ធ ឬការចំណាយរបស់រដ្ឋាភិបាលជាដើម។ ដោយឡែក បើនិយាយពីកម្រិតមីក្រូវិញ គឺសំដៅទៅដល់កត្តាទាំងឡាយដែលនិយាយពីមនុស្សចំណាយប្រាក់ចំណូល។ ចំណុចមីក្រូនេះ គឺមានឥទ្ធិពលខ្លាំងដល់ប្រភេទអាជីវកម្មផ្គត់ផ្គង់ឱ្យអតិថិជនចុងក្រោយ (B2C-Business 2 Consumers)។

S (Social Factors)៖ កត្តាសង្គម
កត្តាសង្គមគឺពាក់ព័ន្ធនឹងសង្គម និងវប្បធម៌ ដែលជាផ្នែកមួយយ៉ាងសំខាន់ដែលម្ចាស់អាជីវកម្ម ឬ ការវិភាគអាជីវកម្មត្រូវតែគិតឱ្យដល់។ ពាក់ព័ន្ធនឹងកត្តានេះ គេនឹងមើលទៅលើ កំណើនប្រជាជន ប្រភេទអាយុប្រជាជន កត្តាសុខភាព ឥរិយាបថអ្នកប្រើប្រាស់ កម្រិតនៃការអប់រំ កត្តាប្រជាសាស្ត្រ (អាយុ ភេទ សាសនា កម្រិតវប្បធម៌ ប្រាក់ចំណូល…) ទំនោរវប្បធម៌ បម្លាស់ប្ដូររបៀបរស់នៅ បម្លាស់ប្ដូរឥរិយាបថ។ ចំណុចនេះគឺមានឥទ្ធិពលដោយផ្ទាល់ដល់អាជីវកម្មដែលអ្នកទីផ្សារត្រូវតែយល់ឱ្យបានច្បាស់ទើបអាចដាក់ចេញនូវយុទ្ធសាស្ត្រប្រកបដោយប្រសិទ្ធភាព។

T (Technological Factors)៖ កត្តាបច្ចេកវិទ្យា
ដូចដែលអ្នកទាំងអស់គ្នាបានដឹងរួចទៅហើយថា កត្តាបច្ចេកវិទ្យាបាននិងកំពុងដើរតួនាទីយ៉ាងសំខាន់បំផុតសម្រាប់អាជីវកម្មនីមួយៗ។ កត្តានេះមានឥទ្ធិពលដោយផ្ទាល់មកលើការលក់ ក៏ដូចជាទីផ្សារ។ ចំណុចនេះគេនឹងពិនិត្យមើលទៅលើ បម្លាស់ប្ដូរបច្ចេកវិទ្យាឌីជីថល ឬទូរស័ព្ទ ប្រព័ន្ធស្វ័យប្រវត្តិកម្ម ការស្រាវជ្រាវ និងការអភិវឌ្ឍន៍ជាដើម។ កត្តានេះដែរ គេនឹងពិនិត្យមើលទៅលើកត្តាបីទៀតគឺ៖
១) រិះរកវិធីថ្មីដើម្បីផលិតផលិតផល និងបង្កើតសេវាកម្ម
២) រិះរកវិធីថ្មីដើម្បីចែកចាយផលិតផល និងសេវាកម្ម
៣) រិះរកវិធីថ្មីដើម្បីទំនាក់ទំនងទៅកាន់ទីផ្សារគោលដៅ

E (Environmental Factors)៖ កត្តាបរិស្ថាន
ក្នុងរយៈពេលប៉ុន្មានទសវត្សចុងក្រោយនេះ ការវិភាគអាជីវកម្មក៏គេយកកត្តាបរិស្ថានមកគិតគូរផងដែរ។ កត្តានេះសំខាន់ព្រោះវាពាក់ព័ន្ធនឹង ភាពកម្រនៃវត្ថុធាតុដើម កង្វះបរិយាកាស និងបរិស្ថាន ការបញ្ចេញជាតិកាបូន និងកត្តាផ្សេងទៀតជាដើម ដែលកត្តានេះក្រុមហ៊ុនត្រូវអភិវឌ្ឍន៍ខ្លួនទៅជាក្រុមហ៊ុនដែលមានដំណើរការដោយក្រោមសីលធម៌ និងប្រកាន់យកគោលការណ៍អភិវឌ្ឍន៍ប្រកបដោយចិរភាព។ នៅប្រទេសអភិវឌ្ឍន៍ទិញអតិថិជនគាំទ្រក្រុមហ៊ុនដែលផលិតនូវផលិតផល ឬសេវាកម្មដែលគិតគូរទៅលើបរិស្ថាន ឬមានកម្មវិធីដើម្បីសង្គម (Corporate Social Responsibilities) ច្រើន។

មេរៀនអាជីវកម្មទាំង ៤ របស់លោក Phil Knight សហស្ថាបនិក និងជានាយកប្រតិបត្តិរបស់ Nike

អ្នកទាំងអស់គ្នាប្រាកដជាធ្លាប់ស្គាល់ក្រុមហ៊ុន Nike ឬប្រសិនបើអ្នកមិនស្គាល់ក្រុមហ៊ុន Nike ក៏លោកអ្នកធ្លាប់ស្គាល់ស្បែកជើងម៉ាក Nike ដែរ តែលោកអ្នកមួយចំនួនប្រហែលជាមិនដឹងថា តើនរណាជាស្ថាបនិកនិងពីរបៀបដែលក្រុមហ៊ុននេះកសាងខ្លួនឡើងមកនោះទេ។ លោក Phil Knight ដែលកាលនោះជាសហគ្រិនវ័យក្មេងដែលបានបោះបង់ការងារជាគណនេយ្យករដើម្បីស្រវាចាប់យកសុបិន របស់លោកដែលចង់ក្លាយជាម្ចាស់ក្រុមហ៊ុនស្បែកជើង។ លោក Phil Knight គឺជាសហស្ថាបនិក និងជានាយកប្រតិបត្តិរបស់ក្រុមហ៊ុនស្បែកជើងម៉ាក Nike។ បើយោងតាម Forbes កាលពីដើមឆ្នាំ២០១៥ លោក Phil Knight ត្រូវបានគេចាត់ទុកថា ជាមហាសដ្ឋីលេខរៀងទី ១៥ ដែលមានទ្រព្យសម្បត្តិសរុបប្រមាណ ២៨.១ ពាន់លានដុល្លារ (ប៊ីលាន)។ ហើយសារតែឃើញពីភាពជោគជ័យនេះហើយទើប BizKhmer សូមលើកយកមេរៀនអាជីវកម្មទាំង៤ របស់លោក Phil Knight ដើម្បីឲ្យសហគ្រិនគ្រប់រូបយកមកអនុវត្ត៖

១) ច្របាច់បញ្ចូលអ្វីដែលជាចំណង់ចំណូលចិត្តរបស់អ្នកនិងអ្វីដែលជាតម្រូវការទីផ្សារ៖សហគ្រិនគ្រប់រូបគួរសួរខ្លួនឯងជាមុនពីអ្វីដែលអ្នកពូកែ អ្វីដែលអ្នកចូលចិត្ត និងអ្វីដែលទីផ្សារកំពុងតែត្រូវការ និងត្រូវសួរខ្លួនអ្នកទៀតថា តើអ្នកនឹងចាប់យកលុយដោយរបៀបណា? លោក Phil Knight ចូលចិត្តរត់និងពូកែខាងរត់ ហើយលោកចង់ក្លាយជាសហគ្រិននិងលោកបានមើលឃើញពីឱកាសទីផ្សារស្បែកជើង។ ដោយសារតែលោកមើលឃើញថាជនជាតិអាមេរិកត្រូវការស្បែកជើងរត់កីឡា ដូចនេះហើយលោកបានទៅប្រទេសជប៉ុន ហើយបានធ្វើកិច្ចព្រមព្រៀងជាមួយក្រុមហ៊ុនផលិតស្បែកជើងមួយ។

២) បង្កើតក្រុមជាមួយមនុស្សពូកែ៖លោក Phil Knight បានធ្វើឲ្យក្រុមហ៊ុន Nike រីកចម្រើនយ៉ាងលឿនតាមរយៈការបង្កើតក្រុមជាមួយលោក Bill Bowerman។ លោក Bill Bowerman មិនត្រឹមតែជាអ្នកផ្ដល់ការណែនាំដ៏អស្ចារ្យ និងជាអ្នកដឹកនាំក្រុមដ៏ប៉ិនប្រសព្វនោះទេ តែលោកក៏ជាអ្នកជំនួញម្នាក់ដ៏ពូកែផងដែរ។ ដោយសារតែមានមនុស្សពូកែបែបនេះហើយ ទើបធ្វើឲ្យក្រុមហ៊ុន Nike មានឈ្មោះល្បីល្បាញរហូតដល់សព្វថ្ងៃ។

៣) ពូកែបញ្ចុះបញ្ចូល៖ការតាំងចិត្តនិងការពូកែបញ្ចុះបញ្ចូល គឺជាធាតុផ្សំនៃភាពជោគជ័យរបស់អាជីវកម្មទាំងអស់។ ប្រសិនបើអ្នកមិនមានជំនឿលើគំនិតរបស់អ្នកទេ អ្នកនឹងមិនអាចលក់គំនិតរបស់អ្នកឲ្យអ្នកវិនិយោគ ឬអតិថិជនបាននោះទេ។ ដោយសារតែពូកែបញ្ចុះបញ្ចូលបែបនេះហើយ ដែលធ្វើឲ្យលោកអាចចុះកិច្ចសន្យាសហការជាមួយក្រុមហ៊ុនជាច្រើន។

៤) កុំព្យាយាមលក់ ព្យាយាមបង្ហាញ៖លោក Phil Knight បានព្យាយាមជួបជាមួយម្ចាស់ហាងជាច្រើនកន្លែងនៅ Pacific Northwest ដើម្បីឲ្យពួកគេសាកល្បងយកស្បែកជើងរបស់លោកទៅលក់ ប៉ុន្តែគំនិតរបស់លោកបានបរាជ័យ។ បន្ទាប់មកលោករកឃើញគំនិតថ្មី ដោយលោកព្យាយាមចូលរួមកម្មវិធីប្រកួតជាច្រើន ហើយលោកព្យាយាមសាកសួរកីឡាករ គ្រូបង្វឹក និងអ្នកគាំទ្រដើម្បីឲ្យពួកគេសាកល្បងពាក់ស្បែកជើងរបស់លោក និងចង់ដឹងថាតើស្បែកជើងរបស់លោកល្អប្រើជាងស្បែកជើងម៉ាក Adidas ដែលជាម៉ាកលេខ១ ឬអត់។ ពិតជាគួរឲ្យភ្ងាក់ផ្អើល ពួកគេទាំងនោះសុទ្ធតែចូលចិត្តវា៕

ធ្វើទីផ្សារតាមរយៈហ្វេសប៊ុក (Facebook Marketing) សម្រាប់អាជីវកម្មខ្នាតតូច

Facebook Marketing for 2018 គឺជាវគ្គសិក្សាដ៏ពិសេសដែលនឹងបង្ហាញពីការធ្វើទីផ្សារតាមរយៈបណ្ដាញសង្គម Facebook។ បច្ចុប្បន្ននៅកម្ពុជាមានអ្នកប្រើប្រាស់ Facebook ប្រមាណ ៨លាននាក់ ស្មើនឹង ៥០%នៃប្រជាជនសរុប។

ក្នុងវគ្គសិក្សានេះ សិក្ខាកាមនឹងអាចអនុវត្តន៍ដោយផ្ទាល់ជាមួយអាជីវកម្មផ្ទាល់ខ្លួន ឬក្រុមហ៊ុនដែលខ្លួនកំពុងបំពេញការងារ។ តម្លៃសំបុត្រ គឺ ២៥ដុល្លារសម្រាប់មនុស្សម្នាក់។

ក្នុងវគ្គសិក្សានេះ លោកអ្នកនឹងទទួលបានការផ្ដល់ជូនជាពិសេស មានសៀវភៅសិក្សា ឯកសារជា Soft Copy ជាង១០ files, លិខិតបញ្ជាក់ការចូលរួម (Certificate) សៀវភៅអេឡិចត្រូនិកល្បីៗអំពីអាជីវកម្មចំនួន ២ក្បាល និងឱកាសបញ្ចូលក្នុង Group Facebook ដែលមានសមាជិកជាម្ចាស់អាជីវកម្មជាង ៥០០នាក់មកពីបណ្ដាខេត្តក្រុងផ្សេងៗ និងឱកាសបង្កើតបណ្ដាញអាជីវកម្មជាច្រើនទៀត។

មាតិកាសំខាន់ៗ៖
1. Why Facebook this time?
2. How to Create a Facebook Page for Your Business?
3. Basic and Advanced Tools and Insights to analyze your Facebook Page
4. Type of contents and the art of creating good content
5. Should you boost? Why you should boost contents and how?
6. Monitoring your competitors
7. How to write Facebook’s report
8. How to Increase Sales through Facebook Page (Lead & Conversion)
9. Other beneficial tips for Business

គំនិតទាំង ៥ យ៉ាងជួយអោយអាជីវកម្មរបស់អ្នកជោគជ័យ

មានការពិតជាច្រើនអំពីការចាប់ផ្ដើមដំណើរការអាជីវកម្មមួយ។ ការពិតនៃអាជីវកម្មគឺជាគំនិតងាយៗទូទៅ ដូចជាប្រសិនបើអ្នកគ្មានលំហូរសាច់ប្រាក់ទេ អាជីវកម្មរបស់អ្នកនឹងបរាជ័យ។ ប៉ុន្តែអ្នកអាចរៀនសូត្រពីមេរៀនជីវិតទូទៅ ពេលអ្នកចាប់ផ្ដើមអាជីវកម្ម។ ខាងក្រោមនេះគឺជាមេរៀនជីវិតទាំង ៥ ជួយឲ្យអាជីវកម្មរបស់អ្នកជោគជ័យ ដែលដកស្រង់ពី entrepreneur.com៖

១) ធ្វើស្រែទាន់ក្ដៅដី៖
ប្រសិនបើអ្នកកំពុងតែគិតចង់ចាប់ផ្ដើមអាជីវកម្ម ប៉ុន្តែមិនទាន់ហ៊ានធ្វើវា តើអ្នកនៅចាំដល់ពេលណាទៀត? ប្រសិនបើអ្នកនៅតែរង់ចាំដល់ពេលល្អឥតខ្ចោះរហូតនោះ អ្នកនឹងមិនអាចចាប់ផ្ដើមបានទេ។ គ្មានពេលដែលល្អឥតខ្ចោះក្នុងការធ្វើអ្វីមួយនោះទេក្នុងលោកនេះ។ អ្នកត្រូវតែហ៊ានប្រឈមមុខនឹងហានិភ័យក្នុងការធ្វើវា។ ប្រសិនបើអ្នករង់ចាំយូរពេក អ្នកអាចនឹងបាត់បង់ឱកាសល្អជាមិនខាន។

២) ហ៊ានលះបង់៖
អ្នកត្រូវហាត់ពត់លត់ដំខ្លួនរបស់អ្នក រៀនប្រឈមមុខនឹងបញ្ហា ឧបសគ្គជាច្រើនពេលចាប់ផ្ដើមអាជីវកម្ម។ អ្នកត្រូវរៀនលះបង់កម្លាំង ចិត្តរបស់អ្នក ពេលវេលារបស់អ្នកផ្ដោតលើអាជីវកម្ម។ ប្រសិនបើអ្នកមិនហានចាកចេញពីភាពស្រណុកស្រួល ដើម្បីប្រឈមនឹងបញ្ហាលំបាកនោះទេ អ្នកនឹងបាត់បង់ឱកាសល្អៗជាមិនខាន។ អ្នកត្រូវតែក្លាហាន ហ៊ានប្រឈមមុខនឹងបញ្ហា ទុក្ខលំបាកផ្សេងៗក្នុងអាជីវកម្មរបស់អ្នក។

៣) ពង្រឹងទំនាក់ទំនង៖
ការមានជំនាញទំនាក់ទំនងល្អអាចជួយអ្នកដើរកាន់តែវែងឆ្ងាយក្នុងជីវិត។ ទំនាក់ទំនងជួយអ្នកបង្កើតខ្សែបណ្ដាញ កាត់បន្ថយជំលោះ បង្ហាញពីគំនិតរបស់អ្នក និងជួយអ្នកឲ្យយល់ពីមនុស្សកាន់តែច្រើន។ ប្រសិនបើអ្នកពូកែនិយាយទំនាក់ទំនង អ្នកដ៏ទៃនឹងឆាប់យល់ពីអ្នក។ ប្រសិនបើអ្នកមិនពូកែទំនាក់ទំនងទេ អ្នកគួរតែរៀនអនុវត្តវា។

៤) ភាពស្មោះត្រង់៖
ភាពស្មោះត្រង់ក្នុងជំនួញគឺជាផ្នែកមួយដ៏ចំបាច់ដើម្បីឲ្យអាជីវកម្មមួយរីកចម្រើន។ អ្នកត្រូវតែស្មោះត្រង់ជាមួយនឹងអតិថិជន និងបុគ្គលិករបស់អ្នក។ ពេលអ្នកមានភាពស្មោះត្រង់ទៅកាន់បុគ្គលិក អ្នកនឹងទទួលបាននូវគុណភាពការងារ ការយកចិត្តទុកដាក់ និងការចូលរួមពីបុគ្គលិក។ ពេលដែលអ្នកស្មោះត្រង់ទៅកាន់អតិថិជន ពួកគេនឹងទុកចិត្តអ្នក ប្រាប់អ្នកពីចំណុចខ្សោយ ប្រាប់អ្នកពេលមានបញ្ហាផ្សេងៗ។ ពេលអ្នកមានភាពស្មោះត្រង់ទៅកាន់បុគ្គលិក និងអតិថិជនរបស់អ្នក ពួកគេនឹងសម្ដែងភាពស្មោះត្រង់ត្រលប់មកអ្នកវិញជាមិនខាន។

៥) ទទួលយកភាពបរាជ័យ៖
បរាជ័យប្រហែលជាពាក្យមួយដែលមានមនុស្សជាច្រើនមិនចូលចិត្ត។ ពេលអ្នកបរាជ័យ អ្នកត្រូវរៀនសូត្រដើម្បីអភិវឌ្ឍខ្លួនអ្នក។ ក្នុងជីវិតរបស់អ្នក ឬក៏ជីវិតអាជីវកម្មក្ដី ពេលអ្នករៀនពីមូលហេតុនៃភាពបរាជ័យ អ្នកនឹងមានគ្រឿងផ្សំដ៏សំខាន់មួយសម្រាប់ភាពជោគជ័យ។ វិធីតែម្យ៉ាងដើម្បីរៀនមេរៀនអស្ចារ្យគឺរៀនពីភាពបរាជ័យ៕

គន្លឹះ ៨ចំណុចដើម្បីធ្វើឱ្យអ្នក ឈប់ស្ទាក់ស្ទើររឿងបើកអាជីវកម្ម

មនុស្សជាច្រើនមានក្ដីស្រមៃចង់បង្កើតអាជីវកម្មផ្ទាល់ខ្លួន ដោយមិនចង់ធ្វើការឲ្យគេអស់មួយជីវិតនោះឡើយ។ ការបង្កើតអាជីវកម្មមួយមិនមែនជារឿងដែលពិបាកនោះទេប្រសិនបើអ្នកមានគោលដៅ គម្រោងច្បាស់លាស់ និងចំណង់ចង់ធ្វើវាពិតប្រាកដនោះ។ BizKhmer សូមនាំជូននូវគន្លឹះ ៨ចំណុចក្នុងការធ្វើអាជីវកម្មដែលដកស្រង់ពី entrepreneur.com៖

១) ពេលដ៏ល្អ៖
កាលពី៣០ឆ្នាំមុន ការធ្វើពាណិជ្ជកម្មមានភាពខុសប្លែកខ្លាំងណាស់ ហើយការរកស៊ីទៀតសោតពិតជាពិបាក។ ប៉ុន្តែបច្ចុប្បន្នអ្វីៗបានផ្លាស់ប្ដូរ។ ឧបសគ្គក្នុងការលោតចូលក្នុងទីផ្សារមានតិចជាងមុនដ៏រាបណាអ្នកចេះបង្កើតភាពខុសប្លែកនៅលើទីផ្សារ។ ដូចនេះ អ្នកមិនចាំបាច់មានអ្នកវិនិយោគទុនច្រើន ឬក៏ត្រូវការទីតាំងល្អនោះទេ អ្នកអាចចាប់ផ្ដើមរកស៊ីថ្ងៃនេះជាមួយនឹងគំនិតនិង Facebook Pageតែប៉ុណ្ណោះ។

២) មិនចាំបាច់មានសញ្ញាប័ត្រ៖
អ្នកមិនចាំបាច់ទាល់តែមានសញ្ញាប័ត្រអនុបណ្ឌិត ឬបណ្ឌិតទើបអាចរកស៊ីបាននោះទេ។ អ្នកគ្រាន់តែមានគោលដៅច្បាស់លាស់ និងមានបំណងចង់រកស៊ីពិតប្រាកដ អ្នកក៏អាចចេញរកស៊ីបានដែរ។

៣) ដោះស្រាយបញ្ហា៖
អាជីវកម្មរបស់អ្នកគួរតែបង្កើតឡើងដើម្បីជួយដោះស្រាយបញ្ហារបស់មនុស្ស។ អ្នកត្រូវគិតពីតម្រូវការ និងបញ្ហាដែលត្រូវដោះស្រាយ ឬចំណុចខ្វះខាតនៅលើទីផ្សារ មិនមែនផ្ដោតតែទៅលើផលិតផល ឬសេវាកម្មដែលមានលក្ខណៈដូចគេដូចឯងនោះទេ។ នេះគឺជាការផ្ដល់តម្លៃទៅដល់អាជីវកម្មរបស់អ្នក។

៤) ធ្វើជាមួយអ្វីដែលអ្នកមាន៖
វិធីដ៏ល្អក្នុងការបង្កើតអាជីវកម្មនោះគឺការចាប់ផ្ដើមជាមួយអ្វីដែលអ្នកមានរួចមកហើយ ដូចជាបទពិសោធន៍ ចំណេះដឹងពីអាជីវកម្មរបស់អ្នកជាដើម។ ប្រសិនបើអ្នកដឹងថាអ្វីដែលអ្នកត្រូវការសម្រាប់អាជីវកម្មរបស់អ្នក នោះអ្នកអាចជួយអ្នកសន្សំសំចៃបានជាច្រើន។ ត្រូវចាំថា បទពិសោធន៍សំខាន់ជាង លុយកាក់ទៅទៀត ហើយត្រូវប្រាកដថា អ្នកមានគ្រប់គ្រាន់ដើម្បីអាចដំណើរការអាជីវកម្មបាន។

៥) អាជីវកម្មជាការបង្កើតលុយ៖
ភាពខុសគ្នារវាងអាជីវកម្ម និងការកម្សាន្តគឺថាអាជីវកម្មបង្កើតលុយឲ្យអ្នក ប៉ុន្តែការកម្សាន្តធ្វើឲ្យអ្នកអស់លុយ។ អាជីវកម្មគឺជាការយកលុយទៅបង្កើតលុយ មិនមែនជារឿងកម្សាន្តនោះទេ។ ដូចនេះអ្នកត្រូវខិតខំធ្វើវាឲ្យអស់ពីសមត្ថភាព។

៦) ចាត់ចែងលុយកាក់៖
អាជីវកម្មត្រូវតែមានគណនីលុយកាក់ដាច់ដោយឡែក ជាជាងច្របូកច្របល់ជាមួយនឹងហិរញ្ញវត្ថុផ្ទាល់ខ្លួនរបស់អ្នក។ ពេលអ្នកបែងចែកលុយកាក់របស់អ្នកដោយឡែកៗ អ្នកនឹងមានភាពងាយស្រួលក្នុងការគ្រប់គ្រង។

៧) មានគម្រោង៖
ត្រូវមានគម្រោងច្បាស់លាស់ពេលអ្នកចង់រកស៊ី។ ការមានគម្រោងអាជីវកម្មច្បាស់លាស់ធ្វើឲ្យអ្នកអាចគិតឲ្យលម្អិតទៅលើអ្វីៗដែលអ្នកត្រូវការក្នុងអាជីវកម្ម និងរបៀបដែលអ្នកនឹងដំណើរការអាជីវកម្មរបស់អ្នក។ ការមានគម្រោងច្បាស់លាស់ធ្វើឲ្យអ្នកមានការផ្ដោតអារម្មណ៍ និងការគ្រប់គ្រងច្បាស់លាស់។

៨) កុំខ្លាច៖
មនុស្សជាច្រើនមានសុបិន្តក្នុងការធ្វើអ្វីមួយ ប៉ុន្តែពួកគេជាប់គាំងពីព្រោះតែភាពភ័យខ្លាច។ ប្រសិនបើអ្នករវល់តែរង់ចាំពេលល្អមកដល់ អ្នកនឹងមិនអាចក្លាយជាអ្នករកស៊ីបានឡើយ។ ដូចនេះអ្នកត្រូវតែចាប់ផ្ដើមធ្វើវាឥឡូវនេះ ដោយជំនះភាពភ័យខ្លាចឲ្យបាន៕

លោក តេង រិទ្ធី ស្ថាបនិក R’ Investment Group៖ ៧ចំណុចដើម្បីជួយដល់ម្ចាស់អាជីវកម្មក្នុងការប្រកួតប្រជែងក្នុងទីផ្សារកម្ពុជា

ការធ្វើមុខជំនួញឲ្យជោគជ័យ គឺជាការប្រាថ្នាចង់បានសម្រាប់ម្ចាស់អាជីវកម្ម និងអ្នកជំនួញគ្រប់គ្នា ប៉ុន្តែការប្រកួតប្រជែងមុខជំនួញក្នុងសមរភូមិទីផ្សារ មិនមែនឱ្យយើងយកឈ្នះងាយស្រួលនោះឡើយ ដូច្នេះវាអាស្រ័យដោយមានកត្តាផ្គួបផ្សុំជាច្រើនទៀតដើម្បីអាចជួយឲ្យមុខជំនួញទទួលបានជោគជ័យក្នុងការជ្រៀតចូលក្នុងទីផ្សារ។ លោក តេង រិទ្ធី ស្ថាបនិកក្រុមហ៊ុន Property Investment Realty Partner និងជាស្ថាបនិក R’ Investment Group បានធ្វើការចែករំលែកនូវគន្លឹះ ៧ចំណុចដើម្បីជួយម្ចាស់អាជីវកម្មក្នុងការប្រកួតប្រជែងទីផ្សារកម្ពុជា នៅក្នុងសិក្ខាសាលាស្តីអំពី Cambodia Marketing Conference នៅមជ្ឈមណ្ឌុលសហប្រតិបត្តិការកម្ពុជា-ជប៉ុន(CJCC)កាលពីថ្ងៃទី២៤ មិថុនា កន្លងទៅនេះ។

ចំណុចទី១. នៅជាមួយទីផ្សារបាន (Come up with the market)៖ ដើម្បីឲ្យយើងអាចនៅជាមួយទីផ្សារបានលុះត្រាតែយើងយល់អំពីទីផ្សារនោះច្បាស់ មានមនុស្សជាច្រើនដែលគាត់មិនដែលនៅជាមួយទីផ្សារទេ គឺពួកគាត់តែងតែចាកចេញពីទីផ្សារ មានន័យថារបស់ខ្លះលែងមានតម្រូវការទីផ្សារទៅហើយប៉ុន្តែយើងនៅតែបន្តធ្វើវាទៀត វាដូចជាការប្រើទូរស័ព្ទដែរពីមុនយើងប្រើទូស័ព្ទម៉ាក Nokia ចុចលេខប៉ុន្តែបច្ចុប្បន្នគេប្រើទូរស័ព្ទម៉ាក iPhone ឬប្រភេទ touch screen ដែលមានលក្ខណៈល្អប្រសើរជាង ជាដើម ទាំងអស់នេះគឺបង្ហាញថាយើងត្រូវតែរក្សារនិងតាមឲ្យជាប់នូវអ្វីដែលទីផ្សារត្រូវការ។

ចំណុចទី២. មានផែនការយុទ្ធសាស្រ្តមុនគេ (Planing a head)៖ បើយើងបង្កើតមុខជំនួញមួយដោយដើរតាមតែគេប្រហែលជាយុទ្ធសាស្រ្តយើងដើរក្រោយគេហើយ ដូច្នេះហើយយើងត្រូវមានផែនការយុទ្ធសាស្ត្រមុនគេដូចជាការបង្កើតFranchise(ឈ្មោះផ្ដាច់មុខក្រុមហ៊ុន)ដោយខ្លួនឯងមុនគេ បើយើងចូលក្នុងទីផ្សារមុនគេគឺយើងមានឱកាសឈ្នះគេ ដូច្នេះហើយកត្តាដែលយើងត្រូវធ្វើមុនគេគឺរៀនសម្លឹងមើលទីផ្សារឲ្យបានវែងឆ្ងាយ។

ចំណុចទី៣. លំហូរសាច់ប្រាក់ (Cash-flow Management)៖ នេះគឺជាបញ្ហាដ៏ធ្ងន់សម្រាប់មុខជំនួញទាំងអស់ព្រោះម្ចាស់អាជីវកម្មភាគច្រើនតែងតែចង់ធ្វើជំនួញហើយប្រកួតប្រជែងក៏ប៉ុន្តែតែងភ្លេចគិតអំពីលំហូរសាច់ប្រាក់ ដូច្នេះយើងត្រូវចាំថាការគ្រប់គ្រងថវិកា លំហូរសាច់ប្រាក់ និងការវិនិយោគគឺជារឿងដែលសំខាន់ដែលយើងត្រូវគិតថាតើជាទំនាស់បែបណ ហើយត្រូវគ្រប់គ្រងផ្នែកហិរញ្ញវត្ថុឲ្យជាប់ព្រោះហិរញ្ញវត្ថុគឺជាកត្តាចម្បងសម្រាប់ការធ្វើជំនួញ។

ចំណុចទី៤. ប្រើប្រព័ន្ធគ្រប់គ្រងត្រឹមត្រូវ (System)៖ មានន័យថាជាប្រព័ន្ធដែលយើងជ្រើសរើសត្រឹមត្រូវសម្រាប់ប្រើដូចជាប្រព័ន្ធគ្រប់គ្រងមុខជំនួញ ប្រព័ន្ធគ្រប់គ្រងបុគ្គលិក ប្រព័ន្ធគ្រប់គ្រងទីផ្សារ និងប្រព័ន្ធគ្រប់គ្រងអតិថិជនជាដើម ដែលម្ចាស់អាជីវកម្មខ្លះគាត់មិនដែលយកចិត្តទុកដាក់ទៅលើការកត់ត្រាអតិថិជនរបស់គាត់នោះទេ ដូច្នេះវាធ្វើឲ្យពួកគាត់ពិបាករកទិន្នន័យនៅពេលដែលគាត់ចង់លក់ផលិតផលឬសេវាកម្មថ្មីឲ្យទៅអតិថិជននៅពេលក្រោយទៀត ដូច្នេះយើងត្រូវចេះរៀបចំប្រព័ន្ធកត់ត្រាឬប្រព័ន្ធរៀបចំទុកដាក់បែបបច្ចេកវិទ្យាឲ្យបានត្រឹមត្រូវ។

ចំណុចទី៥. ជំនាញ និង អាកប្បកិរិយា (Skill & Attitude)៖ មនុស្សមួយចំនួនគាត់មានជំនាញផ្នែកទីផ្សារគាត់អាចពន្យល់ព័ត៌មានលម្អិតពីក្រុមហ៊ុនរបស់គាត់ទៅឲ្យអតិថិជនបានយ៉ាងល្អ ប៉ុន្តែគាត់មិនចេះរៀបចំអាកប្បកិរិយាឲ្យសមរម្យគឺមានន័យថាអត្តចរឹតរបស់គាត់មិនគួរឲ្យនិយាយរក ដែលធ្វើឲ្យអតិថិជនគេមិនសប្បាយចិត្តនិងការទិញផលិតផលរបស់យើងទេ។

ចំណុចទី៦. ការចែករំលែក (Sharing)៖ អ្នកដឹកនាំត្រូវចេះចែករំលែកចំណេះដឹង បទពិសោធន៍ និងវិធីសាស្រ្តផ្សេងៗទៅឲ្យបុគ្គលិកដទៃ ព្រោះថាប្រធានក្រុមហ៊ុនឬក៏អ្នកដឹកនាំដទៃទៀតមិនប្រាកដថាពួកគាត់មានពេលវេលាគ្រប់គ្រាន់នៅក្នុងការធ្វើកិច្ចការគ្រប់បែបយ៉ាងនោះទេ ដូច្នេះក្នុងស្ថាប័ណមួយតៀមទាឲ្យបុគ្គលិកមានចំណេះដឹង និងទទួលបានព័ត៌មានស្មើរៗគ្នា ពេលនោះស្ថាប័ននោះ នឹងរីកចម្រើនប្រកបដោយចីរភាព។

ចំណុចទី៧. ការទទួលយកបរិបទនៃការផ្លាស់ប្តូរ៖ សាកលភាវូបនីយកម្មគឺមានការផ្លាស់ប្តូរដូច្នេះសម្រាប់អ្នកធ្វើជំនួញក៏ដោយ ឬអ្នកសិក្សាក៏ដោយគឺតម្រូវឲ្យមានការផ្លាស់ប្តូរ ជាឧទាហរណ៍មុខជំនួញមួយចំនួនសម្រាប់ពេលបច្ចុប្បន្ននេះលែងជាតម្រូវការសម្រាប់អតិថិជនហើយដូច្នេះយើងត្រូវមានការផ្លាស់ប្តូរមុខជំនួញទៅតាមនោះ ដូច្នេះបរិបទនៃការផ្លាស់ប្តូរយើងត្រូវតែអនុវត្តឡើងហើយត្រូវបើកចិត្តឲ្យទូលាយដើម្បីប្រកួតប្រជែង៕

B.I.O ផ្ដល់ឱកាសពង្រឹងសមត្ថភាពអាជីវកម្ម និងទុនពង្រីកអាជីវកម្ម

បញ្ហាខ្វះខាតទុនបង្វិល បញ្ហាគ្រប់គ្រងធនធានមនុស្ស ខ្វះបទពិសោធន៍ក្នុងការគ្រប់គ្រងប្រតិបត្តិការអាជីវកម្ម កង្វះខាតក្នុងការទទួលបានព័ត៌មានទីផ្សារ និងខ្វះនូវផែនការក៏ដូចជាយុទ្ធសាស្រ្តក្នុងការធ្វើអាជីវកម្ម ជាបញ្ហាដែលម្ចាស់សហគ្រាសខ្នាតតូច និងមធ្យមភាគច្រើននៅកម្ពុជាបាននិងកំពុងជួយប្រទះ។ ការបង្កើតកម្មវិធី B.I.O ដោយសមាគមន៍អ្នកវិនិយោគកម្ពុជា (Cambodia Investor Club-CiC) ត្រូវបានគេមើលឃើញថា មានអត្ថប្រយោជន៍យ៉ាងសំខាន់ក្នុងការចូលរួមចំណែកក្នុងការដោះស្រាយបញ្ហាប្រឈមទាំងនេះ។

BizKhmer បានធ្វើបទសម្ភាសន៍ជាមួយលោក ហ៊ាង រស្មី អ្នកសម្របសម្រួលកម្មវិធី B.I.O នៃសមាគមន៍អ្នកវិនិយោគកម្ពុជា។ លោក នឹងចែករំលែកនូវព័ត៌មានលម្អិតអំពីកម្មវីធីនេះ។

បើអ្នកគិតថាអាជីវកម្មរបស់អ្នកត្រូវការទុនបន្ថែមក្នុងការពង្រីកអោយកាន់តែធំជាងមុន ក៏ដូចជាចំណេះដឹងបន្ថែមដើម្បីពង្រឹងនិងពង្រីកអជីវកម្ម កម្មវិធី B.I.O ជាជម្រើសដ៏ល្អមួយសម្រាប់លោកអ្នក។

SWOT វិភាគចំណុចខ្លាំងនិងខ្សោយអាជីវកម្មដែលម្ចាស់ អាជីវកម្មខ្នាតតូចគួរស្វែងយល់!

SWOT ជាទ្រឹស្ដីវិភាគទៅលើធាតុបួនសំខាន់ៗ គឺ S(strength=ចំណុចខ្លាំង) W(weakness=ចំណុចខ្សោយ) O(opportunity=ឱកាស) និងមួយទៀតគឺ T(threat=កត្តាគំរាមកំហែង)។ ចំណុចទាំងបួននេះ គឺ ជាចំណុចដ៏សំខាន់សម្រាប់អាជីវកម្មនីមួយៗ។ បើយើងមិនស្គាល់ខ្លួនឯងឱ្យច្បាស់ថា ខ្លាំង ឬខ្សោយប៉ុណ្ណាផង តើយើងអាចចាប់យកឱកាស ឬគេចឱ្យចេញពីកត្តាគំរាមកំហែងដោយវិធីណាបាន។

ក្នុងអាជីវកម្មជាក់ស្ដែង មានបញ្ហារាប់រយ ដែលត្រូវដោះស្រាយដើម្បីធ្វើយ៉ាងណាឱ្យអាជីវកម្មអាចបោះជំហ៊ានទៅមុខ។ ប៉ុន្តែ រឿងមួយគឺថា បញ្ហានោះបណ្ដាលមកពីអ្វីឱ្យពិតប្រាកដ? មកពីយើងមិនទាន់កំណត់ចំណុចខ្លាំងរបស់ខ្លួនមិនទាន់បានឬ មួយយ៉ាងណា?

នេះជាឧទាហរណ៍មួយចំនួនអំពីចំណុចខ្លាំង ចំណុចខ្សោយ ឱកាស និងកត្តាគំរាមកំហែង

ខ្លឹមសារលម្អិតនៃចំណុចនីមួយៗ៖ ចំណុចខ្លាំង និងចំណុចខ្សោយគឺស្ថិតនៅក្នុងចង្កោមនៃកត្តាផ្ទៃក្នុងរបស់ក្រុមហ៊ុន។ មានន័យថា ក្រុមហ៊ុនមានចំណុចខ្លាំង ឬខ្សោយដែល ចំណុចទាំងពីរនេះ គឺកើតឡើងពីក្រុមហ៊ុនខ្លួនឯង។
ចំណុចខ្លាំង (strength)៖ គឺជាចំណុចលេចធ្លោរបស់ក្រុមហ៊ុនបើធៀបនឹងគូប្រកួតប្រជែង។ ចំណុចលេចធ្លោនេះ គឺមានន័យថា ជាចំណុចពិសេសដែលខ្លួនមាន និងខ្លាំងជាងគូប្រកួត។ ឧទាហរណ៍ យើងមានផលិតផលមានគុណភាពខ្ពស់ជាងគូប្រកួត កេរ្តិ៍ឈ្មោះក្រុមហ៊ុនល្បីរន្ទឺ វេចខ្ចប់ទាក់ទាញជាង អតិថិជនមានការស្មោះស្ម័គ្រច្រើន មានបច្ចេកវិទ្យាទំនើបខុសពីគេ មានធនធានមនុស្សពូកែៗច្រើន មានប្រព័ន្ធផ្សព្វផ្សាយខ្លាំង និងធនធានច្រើនជាដើម។

ម្ចាស់អាជីវកម្មត្រូវតែដឹងពីចំណុចនេះ ព្រោះថា ដើម្បីដឹងថាខ្លួនឯងនៅត្រង់កន្លែងណា ហើយគូប្រកួតនៅកន្លែងណា?
ចំណុចខ្សោយ (weakness)៖ នេះជាកត្តាដែលរារាំង ឬរាំងស្ទះដល់ដំណើរការលូតលាស់របស់ក្រុមហ៊ុន ហើយក៏ជាចំណុចចាញ់ប្រៀបគូប្រកួតដែរ។ ចំណុចខ្សោយដែលក្រុមហ៊ុនមានគឺត្រូវតែកម្ចាត់ចោល ឬកែប្រែឱ្យប្រសើរឱ្យបាន បើមិនដូច្នោះទេ អាជីវកម្មរបស់យើងនឹងកាន់តែចាញ់គូប្រកួត បាត់បង់ទីផ្សារកាន់តែច្រើន ឬឈានដល់ចំណុចក្ស័យធនក៏ថាបានប្រសិនបើចំណុចខ្សោយរបស់ក្រុមហ៊ុនមានលក្ខណៈធ្ងន់ធ្ងរ។ បញ្ហាទាំងអស់នោះមានដូចជា ខ្វះធនធានហិរញ្ញវត្ថុ ខ្វះធនធានមនុស្សពូកែៗ ខ្វះដៃគូផ្គត់ផ្គង់ ខ្វះដៃគូចែកចាយ ម៉ាកយីហោមិនទាន់ល្បី បំណុលច្រើន លនិងល។ ក្នុងនាមជាម្ចាស់អាជីវកម្ម យើងត្រូវដឹងឱ្យច្បាស់នូវចំណុចខ្សោយទាំងឡាយ ដែលបន្ទច់បង្អាក់ដល់ដំណើរលូតលាស់របស់ក្រុមហ៊ុន។
ឱកាស និងកត្តាគំរាមកំហែង គឺស្ថិតនៅក្នុងចង្កោមនៃកត្តាខាងក្រៅរបស់ក្រុមហ៊ុន។ មានន័យថា ក្រុមហ៊ុនមិនអាចគ្រប់គ្រងកត្តាទាំងពីរនេះបាននោះទេ។
ឱកាស៖ គឺជាកត្តាខាងក្រៅមួយដែលអាចផ្ដល់ការអនុគ្រោះ ឬជួយធ្វើឱ្យក្រុមហ៊ុនកាន់តែមានឧត្ដមភាពប្រកួតប្រជែង (competitive advantage)។ ឱកាសនេះជួនកាលមិនមែនផ្ដល់ផលចំណេញដល់តែក្រុមហ៊ុនយើងតែមួយប៉ុណ្ណោះទេ ប៉ុន្តែគូប្រកួតក៏អាចទទួលបានដូចគ្នាដែរ។ ឧទាហរណ៍ យើងរកស៊ីផ្នែកលក់ទំនិញតាមអនឡាញ ចំនួនអ្នកប្រើអ៊ីនធឺណិតកាន់តែកើនឡើងពីមួយថ្ងៃទៅមួយថ្ងៃនោះក៏ជាឱកាសដែរ ប៉ុន្តែ គូប្រកួតរបស់យើងក៏ទទួលផលពីកំណើនអ្នកប្រើប្រាស់អ៊ីនធឺណិតដូចគ្នាដែរ។ ឱកាសអាចពាក់ព័ន្ធនឹងបទបញ្ញត្តរបស់រដ្ឋាភិបាល ដូចជារដ្ឋាភិបាលលើកលែងពន្ធលើឧបករណ៍បម្រើឱ្យវិស័យកសិកម្មជាដើម។ ឱកាស ក៏អាចពាក់ព័ន្ធនឹងកត្តាបច្ចេកវិទ្យាផងដែរ។
កត្តាគំរាមកំហែង៖ គឺជាកត្តាខាងក្រៅមួយទៀតដែលក្រុមហ៊ុនមិនអាចគ្រប់គ្រងបាន។ កត្តាខាងក្រៅអាចពាក់ព័ន្ធនឹងបទបញ្ញត្តិរបស់រដ្ឋាភិបាល គ្រោះធម្មជាតិ កត្តាថ្លៃដើមឡើងថ្លៃ ការប្រកួតប្រជែងកើនឡើង និងកត្តាផ្សេងៗទៀត។ ដើម្បីទប់ស្កាត់កត្តាគំរាមកំហែង ក្រុមហ៊ុនត្រូវតែមានធ្វើការវិភាគហានិភ័យ (risks) ឱ្យបានច្បាស់លាស់។ មួយទៀតនោះ ដើម្បីទប់ស្កាត់កត្តាមួយចំនួនបាន ក្រុមហ៊ុនត្រូវមានផែនការត្រៀមដែលគេហៅថា (contingency plan)។ សាកគិតបន្តិចទៅមើល ទៅលើអាជីវកម្មរបស់អ្នក ថាតើមានចំណុចខ្លាំង ខ្សោយ ឱកាស និងកត្តាគំរាមកំហែងអ្វីខ្លះ៕

ម៉ាក្រូ និងមីក្រូសេដ្ឋកិច្ច ខុសគ្នាដូចម្ដេច?

ថ្វីបើទស្សនៈវិស័យ នៃទម្រង់សេដ្ឋកិច្ច ម៉ាក្រូ និងមីក្រូសេដ្ឋកិច្ចខុសគ្នាក្ដី ប៉ុន្តែទម្រង់ទាំងពីរនេះ បានដើរតួយ៉ាងសំខាន់ ក្នុងការអភិវឌ្ឍន៍ នយោបាយ និងសេដ្ឋកិច្ចនៃប្រទេសមួយ ឱ្យរីកចម្រើន។ ថ្ងៃនេះ Biz Khmer នឹងបង្ហាញប្រិយមិត្តថា អ្វីទៅជាម៉ាក្រូ និងមីក្រូសេដ្ឋកិច្ច?

ម៉ាក្រូសេកិច្ច ឬ Macroeconomics ជាការសិក្សាផ្ដោតសំខាន់លើសេដ្ឋកិច្ច របស់ប្រទេសទាំងមូល។ អ្នកម៉ាក្រូសេដ្ឋកិច្ច សិក្សាពីផលិតផលក្នុងស្រុកសរុប (GDP) អត្រាអ្នកគ្មានការងារធ្វើ (អត្រានិកម្មភាព) ផលិតផលដុល ការប្រើប្រាស់ (consumption) ការចំណាយ អតិផរណា ការសន្សំ ការវិនិយោគ ពាណិជ្ជកម្មអន្តរជាតិ និងហិរញ្ញវត្ថុអន្តរជាតិជាដើម ដើម្បីឱ្យយល់ពីសេដ្ឋកិច្ចជាតិ។

ម៉ាក្រូសេដ្ឋកិច្ច ជាការសិក្សាធំទូលាយ សំដៅលើសេដ្ឋកិច្ច និងមានគោលបំណងសំខាន់២ គឺ ការស្វែងយល់ពីមូលហេតុ និងផលវិបាក នៃបម្រែបម្រួលចំណូលជាតិក្នុងរយៈពេលខ្លី និងទី២ ជាការស្វែងយល់ពីកត្តា ដែលកំណត់ការរីកចម្រើននៃសេដ្ឋកិច្ចជាតិ រយៈពេលវែង។ ម៉ូដែលម៉ាក្រូសេដ្ឋកិច្ច ត្រូវបានប្រើដោយរដ្ឋាភិបាល និងសហគ្រាសធំៗ ដើម្បីវាយតម្លៃ និងអភិវឌ្ឍន៍ គោលនយោបាយសេដ្ឋកិច្ច និងយុទ្ធសាស្ត្រជំនួញ។

យោងតាមគេហទំព័រសេដ្ឋកិច្ច Economicshelp និង Opentextbc មីក្រូសេដ្ឋកិច្ច ជាការសិក្សាសំខាន់លើសកម្មភាព និងតម្រូវរបស់បុគ្គល គ្រួសារ សហគ្រាស និងក្រុមហ៊ុន អ្នកប្រើប្រាស់ ការកំណត់តម្លៃ និងចំនួនផលិតផលនៅលើទីផ្សារ។

ឧទាហរណ៍៖ តើគ្រួសារ និងបុគ្គល ចំណាយតាមរបៀបណា? តើទំនិញ និងសេវាអ្វី ដែលត្រូវនឹងតម្រូវការរបស់ពួកគេ? ពួកគេធ្វើការពេញម៉ោង ឬក្រៅម៉ោង? តើពួកគេសន្សំប្រាក់បានប៉ុន្មាននាអនាគត? ពួកគេត្រូវការខ្ចីលុយប៉ុន្មាន ដើម្បីបំពេញតម្រូវការបច្ចុប្បន្នរបស់ពួកគេ? តើក្រុមហ៊ុនមួយនេះ ផលិតទំនិញប៉ុន្មាន លក់ចេញប៉ុន្មាន? តើក្រុមហ៊ុន នឹងផ្លាស់ប្ដូរតម្លៃយ៉ាងមិច? តើពួកគេត្រូវជួលបុគ្គលិកប៉ុន្មាននាក់?

បើទោះជា មីក្រូសេដ្ឋកិច្ច មានទ្រង់ទ្រាយតូចជាង ម៉ាក្រូសេដ្ឋកិច្ច ប៉ុន្តែវាបានរួមចំណែកសំខាន់ ក្នុងការអភិវឌ្ឍន៍សេដ្ឋកិច្ចប្រទេសជាតិផងដែរ៕

ខ្លីៗអំពីច្បាប់៖ តើពន្ធគឺជាអ្វី?

ពន្ធគឺជាបន្ទុករបស់អ្នកជាប់ពន្ធចំពោះរដ្ឋ និង ជាកាតព្វកិច្ចរបស់គ្រប់សមាសភាពដែលកំណត់ដោយ ច្បាប់។ យោងតាមច្បាប់ស្តីពីពន្ធដារឆ្នាំ ១៩៩៧ ពន្ធសំដៅដល់ពន្ធផ្ទាល់ដែលជាប្រភេទពន្ធប្រមូលយកដោយផ្ទាល់ ពីអ្នកជាប់ពន្ធ (Taxpayer) ក្រៅពីពន្ធគយ ឬ អាករដែលសំដៅដល់ពន្ធប្រយោលដែលជាប្រភេទនៃការប្រមូលពន្ធ ដោយប្រយោល (មិនបានប្រមូលយកដោយផ្ទាល់ពីអ្នកជាប់ពន្ធ) ។ ការប្រមូលពន្ធនេះ គឺជាការយកតាមតម្លៃ ទំនិញ ឬសេវា ហើយអ្នកជាប់ពន្ធគឺជាអ្នកប្រើប្រាស់ចុងក្រោយ។

ការបង់ពន្ធគឺជាកាតព្វកិច្ចរបស់ពលរដ្ឋគ្រប់រូប ឬ ស្ថាប័នពាក់ព័ន្ធនានាដែលត្រូវបង់ជូនរដ្ឋ ដើម្បីរួមចំណែក ការពារ និង អភិវឌ្ឍន៍មាតុភូមិ។ ចំណូលដែលបានទទួលមកពីការបង់ពន្ធនឹងត្រូវយកទៅប្រើប្រាស់នៅក្នុងកិច្ចការដ៏ ចាំបាច់ដូចខាងក្រោម៖

 បើកប្រាក់ខែជូនមន្ត្រីរាជការ
 បើប្រាក់ខែជូនទាហានកម្លាំងប្រដាប់អាវុធ
 សាងសង់ស្ពាន
 សាងសង់សាលារៀន
 ការពារព្រំដែន
 សាងសង់ផ្លូវថ្នល់
 សាងសង់មន្ទីពេទ្យ។ល។

Jack Ma៖ មិនថាចាស់ឬក្មេង ត្រូវសួរខ្លួនឯង ៣ សំណួរនេះ ពេលបើកក្រុមហ៊ុន

តើអ្នកមានអ្វី? តើអ្នកចង់បានអ្វី? តើអ្នកនឹងបោះបង់អត់? នេះជាសំណួរមហាសេដ្ឋីល្បីឈ្មោះ Jack Ma តែងតែសួរខ្លួនឯងគ្មានលស់ថ្ងៃ ពេលលោកបើកក្រុមហ៊ុន Alibaba ដែលមានផ្សាយលើគេហទំព័រ Cnbc។

លោកបានឱ្យដឹងថា មនុស្សជាច្រើនបានបរាជ័យ ព្រោះតែមិនបានសួរខ្លួនឯងសំណួរទាំងបីនេះ ហើយអាជីវកម្ម Start-Up ៧០% បានបិតទៅវិញ ក្នុងរយៈពេលជាង ១ឆ្នាំ ដោយសារបាត់បង់ការផ្ដោត (Loss of Focus)។

លោកថា មិនថាចាស់ឬក្មេងទេ ពេលបើកអាជីវកម្ម តែងមានចក្ខុវិស័យ ជំនឿចិត្ត ប៉ុន្តែបើចង់ឱ្យជំនឿទាំងនេះ នៅរស់រានមានជីវិត ពួកគេត្រូវសួរខ្លួនឯងបីសំណួរនេះ។

លោកបន្ថែមថា អ្នកចង់បើកអាជីវកម្ម ត្រូវគិតពីសំណួរទាំងបីនេះ ហើយពួកគេនឹងបាត់ភាពភ័យខ្លាច មានសុទិដ្ឋិនិយម និងដឹងអ្វីដែលពួកគេចង់បាន ហើយពួកគេមិនបរាជ័យឡើយ៕

នេះគឺជាជំហានមួយថ្នាក់ៗ សម្រាប់អ្នកដែលត្រៀមខ្លួនរួចរាល់ថានឹងរកស៊ី

ដើម្បីទទួលបានការរកស៊ីមួយដ៏ជោគជ័យ វា ទាមទារឲ្យអ្នកខិតខំឲ្យអស់ពីសមត្ថភាព។ ខណៈដែលអ្នករកស៊ីខ្លះ តែងជួបវិបត្តិ តែបើពួកគេមានការតស៊ូ និងមិនចុះចាញ់ គេនៅតែទទួលបានជោគជ័យនៅពេលក្រោយដដែល។ ខាងក្រោមនេះជាជំហាននៃការរកស៊ី ដែលវា នឹងផ្ដល់ជាគំនិត ងាយស្រួលសម្រាប់ជំនួញអ្នក៖

១) សរសេរគំនិតថ្មីៗដែលមាន ៖ វាអាចចាប់ផ្ដើមបាន លុះត្រាតែអ្នកមានគំនិតថា ចង់ធ្វើអ្វី សិន ហើយវាអាចជាគំនិតដែលអ្នកតែងតែគិត ឬ ក៏អ្នកមានចំណេះដឹងខ្លាំងលើវា។ ពេលអ្នករកបានគំនិត២ ឬ៣ ហើយនោះ អ្នកគួរចាប់ផ្ដើមស្រាវជ្រាវពីវា ឲ្យបានលម្អិត បន្ទាប់មកសិក្សាថា តើ មានក្រុមហ៊ុនណាខ្លះរកស៊ីបែបនេះដែរ? បន្ទាប់មកគិតថា តើអ្នកគួរធ្វើយ៉ាងណាឲ្យល្អជាងក្រុមហ៊ុនគេ?

២) បង្កើតគម្រោងផែនការ ៖ បន្ទាប់ពីអ្នកមានគំនិតហើយនោះ អ្នកគួរសួរខ្លួនឯង បន្តទៀតថា តើអ្នកមានគោលបំណងអ្វី? តើនរណាស័ក្ដិសមជាអតិថិជនអ្នក ? តើគោលដៅចុងក្រោយជាអ្វី? តើអ្នកស្វែងរកថវិកាដោយរបៀបណា ដើម្បីធ្វើឲ្យការរកស៊ីនោះដំណើរការបាន?

៣) ប៉ាន់ស្មានផ្នែកហិរញ្ញវត្ថុ ៖ ថវិកាពិតជាសំខាន់ក្នុងការចាប់ផ្ដើមអ្វីមួយ តែបើអ្នកមិនបានរៀបចំតម្លៃ ឬ ធ្វើការប៉ាន់ស្មានពីវា ថា អាចអស់ប៉ុន្មាននោះ អ្នកអាចនឹងមានបញ្ហា នៅពេល ការរកស៊ីនោះដើរទៅមុខបានបន្តិច។

៤) កំណត់ច្បាប់នៃការរកស៊ីនោះ ៖ មុននឹងអាចចុះឈ្មោះ ក្រុមហ៊ុន របស់អ្នកបាន អ្នកត្រូវតែកំណត់ឲ្យច្បាស់សិន ថា អ្នកជាអង្គភាពប្រភេទអ្វី ។ ច្បាប់របស់ក្រុមហ៊ុនអ្នក អាចប៉ះពាល់អ្វីគ្រប់យ៉ាង ដូចជា ប៉ះពាល់លើការបង់ពន្ធ នៅពេលអ្នកមានជំពាក់បំណុលគេ ដោយរឿងរ៉ាវណាមួយ។

៥) ចុះឈ្មោះក្នុងបញ្ជីរាជរដ្ឋាភិបាល ៖ ដើម្បីក្លាយខ្លួន ជាក្រុមហ៊ុនអាជីវកម្មមួយដោយស្របច្បាប់ អ្នកត្រូវតែចុះឈ្មោះ ក្នុងបញ្ជីរាជរដ្ឋាភិបាល ឲ្យបានត្រឹមត្រូវ។ បន្ទាប់មក បញ្ជូនឯកសារចាំបាច់របស់ក្រុមហ៊ុន រួមមាន ឈ្មោះក្រុមហ៊ុន គោលបំណងនៃការរកស៊ី ក្រុមហ៊ុនដែល ជាដៃគូសហការ ទំនិញ និងព័ត៌មានទាក់ទងនឹងក្រុមហ៊ុន។

៦) ទិញប័ណ្ណធានារ៉ាប់រង ៖ អ្នកធានារ៉ាប់រង នេះ គឺវាជាខ្នងបង្អែកមួយ សម្រាប់ក្រុមហ៊ុនរកស៊ីរបស់អ្នកដែលទើបនឹងចាប់ផ្ដើម ព្រោះពួកគេអាចនឹងជួយអ្នកបានលឿន ពេលអ្នកជួបវិបត្តិ ឬ មានបញ្ហាអ្វីកើតឡើង។

៧) បង្ហាញយីហោក្រុមហ៊ុនរួចឃោសនាវា ៖ នេះជាពេលវេលា ដែលអ្នកគួរតែបង្ហាញអតិថិជនថា ទំនិញគឺនៅទីនេះ ។ ដើម្បីធ្វើឲ្យយីហោអ្នកកាន់តែល្បី អ្នកគួរចេះឃោសនា និងផ្សព្វផ្សាយវា តាមបណ្ដាញសង្គម ទូរទស្សន៍ ឬ កាសែត និងមធ្យោបាយផ្សេងៗ ទៀត ដែលអ្នកគិតថា វា មានប្រសិទ្ធភាពសម្រាប់ការរកស៊ីនោះ៕

យុទ្ធសាស្ត្រទីផ្សារដែលសហគ្រិនត្រូវចេះ ដើម្បីអាជីវកម្ម

គំនិតនិងការបំលែងគំនិតទៅជាសកម្មភាពគឺជារឿងសំខាន់ដែលទំនងជាមានមនុស្សតិចណាស់ដែលអាចធ្វើបាន។ ទីបំផុតអ្នកទាំងនោះត្រូវបានគេដាក់ឈ្មោះថា អ្នកទ្រិស្តីនិយម និងអ្នកប្រតិបត្តិនិយម (អ្នកថានិងអ្នកធ្វើ)។

រកស៊ីគឺជារឿងមួយដែលពោពេញដោយការប្រកួតប្រជែងយ៉ាងស្វិតស្វាញពីព្រោះអ្នករកស៊ីច្រើនតែទីផ្សារតែមួយ។ដូចនេះការស្គាល់យុទ្ធសាស្ត្រជំនួញឬទីផ្សារនៃការរកស៊ីគឺវាមានសារៈសំខាន់។ខ្ញុំសូមបកស្រាយនូវយុទ្ធសាស្ត្រទីផ្សារមួយបែបដល់ប្រិយមិត្តអ្នកអានទាំងអស់អោយបានយល់ដឹងខ្លះៗអំពីយុទ្ធសាស្ត្រទីផ្សារ។

យុទ្ធសាស្ត្រទីផ្សារត្រូវបានបង្កើតឡើងជាដំបូងដោយលោក Neil Borden ជាប្រធានសមាគមន៍ទីផ្សារអាមេរិចក្នុងឆ្នាំ១៩៥៣និងជាសាស្ត្រាចារ្យមហាបរិញ្ញាផ្នែកទីផ្សារនិងផ្សព្វផ្សាយនៃសាកលវិទ្យាល័យពាណិជ្ជកម្មហាវឺត ដែលត្រូវបានគេប្រទះឃើញក្នុងរៀវភៅមួយក្បាលរបស់លោកបោះពុម្ភឆ្នាំ១៩៤២ មានចំណងជើងថា The Economic Effects of Advertising ។ ក្រោយមកអ្នកទីផ្សារម្នាក់ លោក E. Jerome McCarthy បានស្នើឡើងនូវការធ្វើចំណែកថ្នាក់4Pនៅឆ្នាំ១៩៦០។ យុទ្ធសាស្ត្រនេះជាគន្លឹះមួយក្នុងផែនការទីផ្សារ ដែលគេហៅថា4p មានដូចជា Product, Price, Promotion និង Placement។ បច្ចុប្បន្នយុទ្ធសាស្ត្រនេះត្រូវបានប្រើប្រាស់ដោយអ្នកនាំទំនិញទៅ កាន់ផ្សារទូទាំងពិភពលោក។ តើ4P មានអ្វីខ្លះទៅ?

P1: Product (ផលិតផល)

ផលិតផលត្រូវបានគេមើលឃើញថាជាតម្រូវការរបស់អ្នកប្រើប្រាស់។ វាអាចជាទំនិញរូបីយឬ សេវាកម្ម។ផលិតផលនីមួយៗតែងតែមានវដ្តជីវិតរបស់វា រួមមានកំណើនថេរ លែងសូវពេញនិយម និងនៅទីបញ្ចប់ការលក់ថយចុះឈានរហូតដល់លែងមានតម្រូវការ។ ដូច្នេះ បណ្ដាអ្នកនាំទំនិញទៅកាន់ផ្សារ គួរសិក្សាទីផ្សារឲ្យបានល្អិតល្អន់ទៅលើអាយុកាល នៃវដ្តផលិតផល។ តើទំនិញឬសេវាកម្មរបស់ខ្លួនជាទំនិញឬសេវាកម្មដែលមនុស្សគ្រប់រូបតែងតែត្រូវការជាចំបាច់?

P2: Price (តម្លៃ)

ទំហំថវិកា ដែលអតិថិជនត្រូវតបស្នងសម្រាប់ផលិតផលឬសេវាកម្មមានសារៈសំខាន់ណាស់ ក្នុងការកំណត់ប្រាក់ចំណេញរបស់ក្រុមហ៊ុន និងរយៈពេលឈរជើង។ ការប្រែប្រួលតម្លៃមានឥទ្ធិពលខ្លាំងណាស់ទៅលើយុទ្ធសាស្ត្រទីផ្សារ និងអាស្រ័យលើភាពបត់បែននៃតម្លៃផលិតផល ហើយការជះឥទ្ធិពលទៅលើតម្រូវការនិងការលក់ផងដែរ។ យុទ្ធសាស្ត្រកំណត់តម្លៃផ្អែកលើកត្តាសំខាន់ៗ៣ជាមូលដ្ឋាន៖ ការពិនិត្យមើលតម្លៃប្រកួតប្រជែងទីផ្សារ តម្លៃវាយលុកទីផ្សារ និងតម្លៃសមរម្យអាចទទួលយកបាន។

P3: Promotion (ការផ្សាយឃោសនា)

មធ្យោបាយផ្សាយឃោសនាត្រូវបានប្រើប្រាស់ដើម្បីផ្ដល់ព័ត៌មានឲ្យ អតិថិជនគោលដៅបានយល់ និងបង្ហាញផលិតផល និងសេវាកម្ម។ មធ្យោបាយទាំងនោះរួមមាន៖ ការផ្សាយពាណិជ្ជកម្ម ទំនាក់ទំនងសាធារណៈ ការរៀបចំលក់ និងកម្មវិធីលក់ពិសេស។ ការឃោសនាអាចធ្វើទៅបានតាមប្រព័ន្ធផ្សព្វផ្សាយ អ៊ីនធើណេត ផ្លាកបាណូ កម្មវិធីតាំងពិពណ៌ និងព្រឹត្តិការណ៍ផ្សេងៗ។ ជាពិសេសក្នុងបរិបទនេះគឺគេផ្តោចយកចិត្តទុកដាក់លើបណ្តាញសង្គមខ្លាំងបំផុត។ ក្រៅពីនេះ ការដែលអតិថិជនបានប្រើប្រាស់ផលិតផលលោកអ្នកហើយពេញចិត្ត រួចណែនាំផ្ទាល់មាត់ទៅដល់អ្នកប្រើប្រាស់ដទៃទៀត ក៏ចាត់ទុកជាការផ្សាយឃោសនាដែរ ហើយថែមទាំងមានប្រសិទ្ធភាពខ្ពស់ថែមទៀតផង។ ក្រៅពីនេះ ការបញ្ចុះបញ្ចូលរបស់បុគ្គលិកផ្នែកលក់ដើរតួនាទីយ៉ាងសំខាន់សម្រាប់ ទំនាក់ទំនងសាធារណៈ។

P4: Placement (ការចែកចាយ)

ការចែកចាយគឺឆ្ពោះទៅយកលទ្ធភាពទទួលបានផលិតផលឬភាពងាយស្រួលសម្រាប់អតិថិជនក្នុងការរកទិញផលិតផល។ យុទ្ធសាស្ត្រចែកចាយ ដែលពេញនិយមជាងគេគឺការចែកចាយទៅកាន់ដេប៉ូឬឈ្មួញកណ្ដាលឲ្យលក់បន្ត។យុទ្ធសាស្ត្រធ្វើយ៉ាងណាដើម្បីអោយសាធារណជនបានមើលឃើញពីផលិតផលរបស់យើងបានគ្រប់ទីកន្លែងទាំងអស់។ការធ្វើបែបនេះគឺជាការសម្រួលដល់អតិថិជនផងដែរ៕

វិធី៤យ៉ាង ជួយឲ្យអ្នកអាចសន្សំលុយបានច្រើនជាងមុន

តើអ្នកស្អប់ពេលដែលអ្នកត្រូវការលុយខ្លាំង ហើយកាបូបលុយរបស់អ្នកគ្មានលុយសោះមែនទេ? មិនថាអ្នកមានលុយតិចឬច្រើនប៉ុណ្ណានោះទេ ការចេះចាយលុយឲ្យបានត្រឹមត្រូវគឺជាទង្វើដ៏ល្អ បើមិនដូច្នោះទេ មានប៉ុន្មានក៏មិនចេះសល់ដែរ។ អនុវត្តគន្លឹះខាងក្រោមសម្រាប់ការសន្សំលុយ៖

១) បង្កើតគម្រោងថវិកា ៖ អ្នកត្រូវកត់ទុកនូវចំណូលនឹងចំណាយរបស់អ្នកឲ្យបានច្បាស់លាស់ ដូច្នេះអ្នកអាចដឹងតើស្ថានភាពការចាយលុយរបស់អ្នកវាយ៉ាងដូចម្ដេច។ ក្រោយពីអ្នកដឹងហើយ អ្នកត្រូវបង្កើតគម្រោងថវិកាសម្រាប់ខែក្រោយ តើអ្នកអាចកាត់បន្ថយបានអ្វីខ្លះ។

២) មានគម្រោងច្បាស់លាស់មុនពេលទិញទំនិញ ៖ កត់ទុកនូវអ្វីដែលអ្នកចង់ទិញនៅពេលដែលអ្នកនៅផ្ទះ។ អ្នកត្រូវទិញតាមគម្រោងដែលអ្នកបានត្រៀមទុក។ ម៉្យាងវិញទៀត ពេលអ្នកទៅផ្សារ អ្នកដើរទៅទិញអ្វីដែលអ្នកត្រូវការកុម្ម៉ង់ កុំដើរលេងមើលទំនិញដទៃ។

៣) រង់ចាំពេលគេបញ្ចុះតម្លៃ៖ ប្រសិនជាអ្នកដឹងថាអ្នកត្រូវការវត្ថុអ្វីមួយ កុំទិញវានៅថ្ងៃនេះ។ អ្នកគួររង់ចាំដល់គេបញ្ចុះតម្លៃឬតម្លៃនៃទំនិញចុះថោក។ ទិញអ្វីដែលអ្នកត្រូវការតែប៉ុណ្ណោះ។

៤) កុំសូវប្រាស្រ័យទាក់ទងជាមួយមនុស្សដែលចូលចិត្តខ្ចីលុយពេក ៖ ពេលខ្លះដោយសារតែការអាណិតពេលឃើញ អ្នកដទៃដាច់លុយ អ្នកក៏ឲ្យលុយខ្ចី ប៉ុន្តែភ្លេចគិតថា ប្រាក់របស់ខ្លួនក៏មានដែនកំណត់ដែរ។ ដូច្នេះហើយបើឲ្យអ្នកដទៃខ្ចីលុយ ដោយមិនបានពិនិត្យអំពីស្ថានភាពហិរញ្ញវត្ថុរបស់ខ្លួន វានាំឲ្យខ្លួនអ្នកត្រូវប្រឈមនឹងបញ្ហាថ្ងៃក្រោយមិនខាន។ សូមកុំប្រាស្រ័យទាក់ទងជាមួយមនុស្ស ពូកែខ្ចីលុយខ្លាំងពេក ព្រោះពេលខ្ចីលុយពីអ្នកគឺស្រួលទែ តែពេលដែលអ្នកត្រូវការវិញ គឺមិនងាយឡើយ៕

ពាណិជ្ជកម្មជោគជ័យត្រូវស្គាល់ SWOT

ស្គាល់ខ្លួនឯង ឬស្គាល់អ្នកដទៃមិនមែនជាការងារងាយស្រួលនោះទេ ពេលខ្លះស្គាល់ខ្លួនឯងវាពិបាកជាងស្គាល់អ្នកដទែ ទៅទៀត។ មនុស្សបរាជ័យភាគច្រើនគឺជាមនុស្សដែល មិនស្គាល់ខ្លួនឯងច្បាស់។ ការស្គាល់ពីចំណុចខ្លាំង និងចំណុច ខ្សោយខ្លួនឯងវាជារឿងសំខាន់បំផុត ពីព្រោះថាមនុស្សម្នាក់ៗរស់នៅក្នុងសង្គម មិនអាចរស់នៅតែឯងឯកោ បានទេ។ ការស់នៅក្នុងសង្គមគឺជាការរស់នៅដោយការប្រកួតប្រជែងដោយស្មោះត្រង់ ទៅតាមសង្គម។ ទាំងរូបវន្តបុគ្គល ក៏ដូចជា នីតិបុគ្គលដែរ ដើម្បីដឹងពីខ្លួនឯងច្បាស់តើត្រូវយល់ដឹងចំណុចអ្វីខ្លះ ?

SWOT គឺជាអ្វី? គឺជាគោលការណ៍គ្រប់គ្រងការងារទាំងរដ្ឋ និងឯកជន គឺជាការវិភាគពីស្ថានភាពរបស់អង្គភាព ឬស្គាល់ពីអង្គភាពអោយបានច្បាស់លាស់ដើម្បីកំណត់យុទ្ធសាស្ត្រគ្រប់គ្រង។ ការកំណត់យុទ្ធសាស្ត្រគ្រប់គ្រងនេះវាគឺជារឿងសំខាន់ និងចាំបាច់ ពីព្រោះក្រៅពីធ្វើឱ្យអ្នកគ្រប់គ្រងដឹងពីការផ្លាស់ប្តូរផ្សេងៗដែលកើតឡើងហើយនោះ ការវិភាគនេះក៏បានកំណត់ការងារដើម្បីសម្រេចតាមគោលបំណង និងទិសដៅដែលគ្រោងទុក ស្របតាមទ្រឹស្តីហៅថា SWOT ជាឧបករណ៍ក្នុងការប៉ាន់ស្មានពីស្ថានភាព។

សម្រាប់ពាណិជ្ជករអនឡាញអាចមិនសូវស្គាល់ច្បាស់ពាក្យថា SWOT ហើយអាចមិនដឹងពីអត្ថន័យ និងមិនដឹងថាយកទៅប្រើយ៉ាងដូចម្តេចជាមួយអាជីវកម្មអនឡាញ ។ ពាក្យថា SWOT គឺជាយុទ្ធសាស្ត្រ ឬវិធីសាស្ត្រទីផ្សារមួយបែបដែលមានអត្ថន័យមកពីអក្សរកាត់របស់ភាសាអង់គ្លេស៤តួ គឺ ៖

– S ឬ Strengths ៖ ជាចំណុចខ្លាំងទាំងឡាយនៅក្នុងអង្គភាព ដែលធ្វើឱ្យកើតនូវភាពរឹងមាំ ដែលចំណុចខ្លាំងនេះអាចយកប្រៀបលើគូប្រកួតប្រជែងបាន ។ វាជាគុណសម្បត្តិដែលកើតពីបរិយាកាសជុំវិញនៃស្ថាប័នដូចជា ចំណុចខ្លាំងខាងហិរញ្ញវត្ថុ ការផលិត ប្រភពធនធាន និងគុណភាពទំនិញ ដែលអាជីវកម្មអនឡាញត្រូវប្រើជាប្រយោជន៍ក្នុងការកំណត់យុទ្ធសាស្ត្រទីផ្សារ ។

-W ឬ Weaknesses ៖ ជាចំណុចខ្សោយនៅក្នុងអង្គភាពដែលធ្វើឱ្យកើតជាភាពទន់ខ្សោយឬជាការចាញ់ប្រៀបគូប្រជែង ។ វាជាបញ្ហា ឬភាពអវិជ្ជមានចេញពីផ្ទៃក្នុងដែលពាណិជ្ជករអនឡាញត្រូវស្វែងរកដំណោះស្រាយបញ្ហានោះឱ្យខាងតែបាន។

-O ឬ Opportunities ៖ មានន័យថា ជាឱកាសសំដៅលើកត្តាផ្សេងៗនៅខាងក្រៅដែលរួមចំណែកជាប្រយោជន៍ ។ ឱកាសអាចជួយលើកកម្ពស់ដល់ការដឹកនាំអាជីវកម្មបានដូចជា លក្ខខណ្ឌសេដ្ឋកិច្ចដែលបង្កើនទម្រង់ ។ ភាពខុសគ្នារវាងចំណុចខ្លាំង និងឱកាសនៅក្នុងការធ្វើអាជីវកម្ម គឺជាកត្តាដែលកើតពីបរិយាកាសខាងក្នុង ចំណែកឱកាសគឺជាលទ្ធផលពីបរិយាកាសខាងក្រៅ ។ ក្នុងរឿងនេះពាណិជ្ជករអនឡាញដែលល្អ ត្រូវតែស្វែងរកឱកាសជាប់ជាប្រចាំ ដើម្បីយកមកប្រើជាប្រយោជន៍សម្រាប់បង្កើនការលក់។

-T ឬ Threats ៖ ជាឧបសគ្គផ្សេងៗនៅខាងក្រៅ ដែលរារាំងដល់ការប្រតិបត្តិការអាជីវកម្ម ។ វាជាការរឹតបន្តឹងកើតពីបរិយាកាសខាងក្រៅ ពាណិជ្ជករចាំបាច់ត្រូវរៀបចំយុទ្ធសាស្ត្រទីផ្សារឱ្យសមស្រប និងព្យាយាមលុបបំបាត់ឧបសគ្គដែលកើតឡើងឱ្យអស់ និងទាន់ពេលវេលា ។

SWOT គឺជាយុទ្ធសាស្ត្រទីផ្សារ៤ចំណុចរួមមាន ៖ ចំណុចខ្លាំង គឺជាឱកាសដ៏ល្អបំផុតរបស់អាជីវកម្ម, ចំណុចខ្សោយ ជាការចាញ់ប្រៀបខាងអាជីវកម្ម, ឱកាស ជាកត្តារួមចំណែកដល់ប្រយោជន៍ក្នុងការអនុវត្តអាជីវកម្មបានតាម ផែនការទីផ្សារដែលកំណត់ទុក ហើយចំណុចចុងក្រោយ គឺឧបសគ្គ អាចជះឥទ្ធិពលដល់ដំណើរការរបស់អាជីវកម្ម។

នៅពេលបានដឹងពីអត្ថន័យរបស់ SWOT គឺជាអ្វីហើយនោះ ពាណិជ្ជករក៏ដូចជាមនុស្សទូទៅក៏អាចយកមកប្រើជាឧបករណ៍ក្នុងការវិភាគស្ថានភាពសម្រាប់កំណត់ផែនការទីផ្សារឱ្យសមស្របជាមួយកត្តាទាំង៤ខាងលើបានផងដែរ ដែលធ្វើឱ្យអាជីវកម្ម ឬបុគ្គលផ្ទាល់ខ្លួនទទួលបានជោគជ័យយូរអង្វែង៕

ការវិភាគពីគន្លះជោគជ័យនៃការធ្វើអាជីវកម្ម

នេះគឺជាផ្នែកដ៏សំខាន់បំផុតនៃផែនការអាជីវកម្មដោយសារអ្នកវិនិយោគឬធនាគារតែងតែផ្នែក
លើផ្នែកនេះដើម្បីសម្រេចចិត្តថាតើត្រូវមើលលម្អិតទៅទៀតទេ។
អ្នកគួរតែប្រាប់ពីមូលហេតុសំខាន់ៗដែលអាជីវកម្មរបស់អ្នកនឹងជោគជ័យក្នុងចំណុចនេះ។
 តើអ្វីជាបញ្ហាចម្បងនៅក្នុងទីផ្សារ
ហើយហេតុអ្វីអតិថិជននឹងទិញនូវផលិតផលរឺសេវាកម្មរបស់អ្នកដែលជាដំណោះសា្រយរបស់បញ្ហានោះ?
 តើអាជីវកម្មរបស់អ្នកនឹងដោះស្រាយនូវបញ្ហានោះដោយរបៀបណា?
 តើអាជីវកម្មនោះមានផ្នែកទាក់ទាញផ្នែកសេដ្ឋកិច្ចកម្រិតណា ហើយអនាគតនឹងរីកចម្រើនកម្រិតណា?
 នណារជាដៃគូររបស់អ្នកក្នុងការចាប់ផ្តើមអាជីវកម្ម?
១.ឱកាសនឹងការវិភាគទីផ្សារ(opportunity and Market analysis)
អ្នកវិនិយោគនឹងដាក់ទុនវិនិយោគប្រសិនបើអាជីវកម្មរបស់អ្នកអាចដោះស្រាយបញ្ញាធំរបស់អតិថិជនបាន។ នោះមានន័យថា
ទំហំទីផ្សារត្រូវតែធំមានសក្ដានុពលរីកចំរើនទៅថ្ងៃអនាគត។
ត្រង់ចំណុចនេះអ្នកគួរចាប់ផ្ដើមជាមួយការយល់ឲ្យច្បាស់ពីអតិថិជនអាជីវកម្មអ្នក
ហើយបញ្ជាក់ហេតុអ្វីបានជាអតិថិជនទាំងនោះគួរជ្រើសរើសផលិតផលរបស់អ្នកដើម្បីដោះស្រាយនូវបញ្ហារបស់ពួកគាត់។
 តើអ្វីជាបញ្ហាដែលនឹងត្រូវដោះស្រាយដោយអាជីវកម្មរបស់អ្នក?
 នរណាជាអតិថិជន? ហើយទីផ្សាមានទំហំប៉ុណ្ណា?
 សក្ដានុពលនៃទីផ្សារអនាគត?
២. ដំណោះស្រាយ(The solutions and Concept)
មានផលិតផលជាច្រើនខ្វះការយកចិត្តឬចំណាប់អារម្មណ៍ពីអតិថិជនដោយសារផលិតផលនោះមាន
លក្ខណ:ទូទៅពេក។ ផលិតផលរបស់អ្នកត្រូវតែមានចំណុចពិសេសត្រង់ណាមួយខុសពីគូរប្រកួតប្រជែងហើយអាច
ដោះស្រាយបញ្ហារបស់អតិថិជនទើបអាចជោគជ័យនៅលើទីផ្សារ។
 តើអ្វីជាផលិតផលឬសេវាកម្មរបស់អ្នក?
 ពិព័ណនាស្ថានភាពមុនពេលប្រើនិងក្រោយពេលប្រើផលិតផលនោះ។ តើអ្វីជាចំនុចពិសេស
ហេតុអ្វីអតិថិជនត្រូវការចំណុចពិសេសនេះ?
 ហេតុអ្វីអតិថិជននឹងមានឆន្ទ:ក្នុងការទិញ?
 តើអាជីវកម្មទាំងមូលរបស់អ្នកពិសេសត្រង់ណា? និងមានសក្ដានុពលកម្រិតណាដែរ?
៣. យុទ្ធសាស្ដ្រទីផ្សារ(Marketing and Sale)
ការលក់ជាចំណុចស្លាប់របស់ក្រុមហ៊ុន
ដូចនេះអ្នកគួរបង្ហាញឲ្យបានច្បាស់ថាតើអ្នកនឹងធ្វើការទំនាក់ទំនងជាមួយអតិថិជនគោលដៅដោយរបៀបណា។
 តើអ្នកនឹងប្រើមធ្យោបាយអ្វីខ្លះដើម្បីបានទៅដល់អតិថិជនគោលដៅរបស់ខ្លួន?
 តើអ្នកនឹងធ្វើការបែងចែកក្នុងបណ្ដាញណាមួយ?
 នរណាជាអ្នកសម្រេចចិត្តទិញ និងមានអំណាចទិញ?ហើយនរណាដែលមានឥទ្ធិពលលើពួកគាត់?
 តើផលិតផលរបស់អ្នកអាចលក់នៅលើទីផ្សារប៉ុន្មានឆ្នាំ?
នរណាខ្លះជាដៃគូនៅក្នុងការផ្សព្វផ្សាយ និងលក់?
៤.ការគ្រប់គ្រងប្រតិបត្តិការ (Operations Management)
ការរៀបចំផែនការប្រតិបត្តិការផលិតកម្មដើម្បីផ្គត់ផ្គង់ទីផ្សារ។
 តើត្រូវការធនធានអ្វីខ្លះដើម្បីផលិតផលិតផលនោះ?
 តើអ្នកមានផែនការអភិវឌ្ឍន៍ផលិតផលនោះហើយឬនៅ
 តើអាចនឹងមានហានិភ័យអ្វីខ្លះ ក្នុងដំណើរអភិវឌ្ឍន៍
 តើអ្នកមានផលិតផលគំរូហើយឬនៅ?
ផលិតផលនោះ?
 តើអ្នកនឹងរៀបចំសង្វាក់បែងចែកយ៉ាងដូចម្ដេចចាប់ពីកន្លែងផលិតដល់ដៃអតិថិជន?
តើអ្នកបានរៀបចំឲ្យមានប័ណ្ណបាតង់ដើម្បីការពារកម្មសិទ្ធបញ្ញារបស់ផលិតផលអ្នកហើយឬនៅ?
៥.រចនាសម្ព័ន្ធក្រុហ៊ុន(Team and Organization)
ការបង្កើតក្រុមការងារដែលមានជំនាញគ្រប់គ្រាន់គ្រប់ផ្នែកគឺជាការងារសំខាន់ណាស់ដើម្បីឲ្យអ្នកវិនិយោគមានជំនឿលើអាជីវកម្មរប
ស់អ្នក។អ្នកគួរតែពិចារណារនូវសំនួរដូចជា៖
 តើស្ថាបនិកនិងបុគ្គលិកសំខាន់ៗមានប្រវត្តិមកពីណា ហើយមានតួនាទីអ្វីខ្លះ?
 តើអាជីវកម្មរបស់អ្នកនូវខ្វះជំនាញអ្វីទៀត?
 តើពួកគាត់មានការតាំងចិត្តកម្រិតណាចំពោះអាជីវកម្មនោះ?
៦.ហានិភ័យ (Risk)
អាជីវកម្មថ្មីអាចប្រឈមមុខនិងហានិភ័យបួនប្រភេទគឺ ហានិភ័យផលិតផល/ បចេ្ចកវិទ្យាហានិភ័យទីផ្សារ/
ការប្រកួតប្រជែងក្រុមហានិភ័យការងារការគ្រប់គ្រងនិងហានិភ័យហិរញ្ញវត្ថុ។ដើម្បីផ្ដល់ជំនឿទុកចិត្តដល់អ្នកវិនិយោគបាន
សហគ្រិនឬអ្នកគ្រប់គ្រងអាជីវកម្មត្រូវបង្ហាញយុទ្ធសាស្រ្តនិងយុទ្ធវិធីដើម្បីកាត់បន្ថយនូវហានិភ័យទាំងនោះ។
 តើអ្វីជាកត្តាប្រឈមនៃការអភិវឌ្ឍន៍ផលិតផលអ្វីខ្លះដែលអាចមានគ្រោះថ្នាក់ដល់អាជីវកម្មអ្នក?
 តើអ្នកបានគ្រោងអ្វីខ្លះដើម្បីទប់ស្កាត់នឹងកត្តាប្រឈមទាំងនោះ?
 នរណាជាគូរប្រគួតប្រជែងធំបំផុតនៅក្នុងទីផ្សារ តើអ្នកមានយុទ្ធសាស្ត្រអ្វីខ្លះដើម្បីប្រកួត?
 តើអ្នកថ្មីងាយនឹងចូលទីផ្សាររបស់អ្នកឬទេ?
 តើមានផលិតផលជំនួសនៅលើទីផ្សារទេ?
៧.ហិរញ្ញវត្ថុ(Financial plan and Investment offering)
ទោះបីជាការធ្វើផែនការហិរញ្ញវត្ថុជាចំនុចចុងក្រោយនៃអាជីវកម្ម
ការសម្រេចចិត្តទាំងឡាយណាដែលទាក់ទងនឹងហិរញ្ញវត្ថុគឺមានឥទ្ធិពលលើគ្រប់ផ្នែកទាំងអស់នៃអាជីវកម្ម។
សំខាន់គឺអ្នកវិនិយោគចង់ដឹងថា
 តើអាជីវកម្មរបស់អ្នកត្រូវការដើមទុនប៉ុន្មានដើម្បីជោគជ័យ?
 តើអាជីវកម្មរបស់អ្នកនឹងឈប់ខាតនៅឆ្នាំណា?
 តើ៥ឆ្នាំទៀតអ្នកនឹងអាចពង្រីកទីផ្សារបានទំហំប៉ុន្មាន?
គួរបញ្ជាក់ម្ដងទៀតថា ផែនការអាជីវកម្មគឺសម្រាប់អ្នកបានចាប់ផ្ដើមរួចហើយ
ហើយមានគម្រោងពង្រីកអាជីវកម្ម។បើអ្នកមិនទាន់ចាប់ផ្ដើមទេអ្នកគួររៀបចំគំរូអាជីវកម្ម មិនមែនផែនការអាជីវកម្មទេ។